Despues di kuater luna di trabou duru nos tabata tin nos promé presentashon, nos a tuma dos siman di pousa pa tur hende disfruta dianan di fiesta ku famia i nos tabata tin un kuminsamentu di aña virtual. Den e tempunan insigur aki tur organisashon i kompania ta  hañanan ku retonan desafiante pa atende kuné, kual nos tambe ta enkontrá kuné.

No opstante, nos ta keda kòrda e dikon nos a lanta Elisa Academy i esei nos kier kompartí ku bo; kiko nos ta ofresé, kiko studiantenan ta siña i nos mishon i vishon pa futuro.

ELISA ACADEMY

Na Elisa Academy bo ta siña abilidatnan propio di e mundu di aktuashon i teatro: bo ta siña aktuashon, kon pa usa bo stèm na e manera korekto, kon pa usa bo kurpa komo instrumento, e forsa di presensia di esenario, skibi propio teksto, kon pa krea bo propio komposishonnan i tambe bo ta aktua den diferente obra.

Ku otro palabra, bo ta sera konosí ku aktuashon, obra, skibimentu di teksto, i kreashon di bo propio obra teatral. Tambe bo ta haña lès di diferente tipo di moveshon, ekspreshon verbal (papiamentu) i kreashon di teater. Bo ta haña lès serka diferente dosente invitá ku ta traha den e mundu teatral i ku ta traha den eksterior.

Na nos Akademia bo ta enrikesé bo vishon riba diferente aspekto. Nos ta retá bo pa pèrmití polítika, sosiedat, internèt, susesonan aktual, literatura, ‘blogs’ i otro desaroyonan inovativo den mundu inspirá bo. Komo studiante bo ta siña pa desaroyá un forma di pensamentu outónomo i pa apelá riba bo propio kreatividat. Bo ta desaroyá bo mes den un persona/ aktor ku tin e abilidat pa traha ku otro i ku por hasi un trabou multidisiplinario.

STUDIANTE

Nos ta brinda lès na diferente grupo di enfoke:

• Lès di teater pa muchanan entre 5 pa 11 aña;
• Lès di aktuashon i teater pa hóbennan entre 12 pa 18 aña;
• Lès di aktuashon pa hóbennan adulto entre 18 pa 30 aña;
• Lès di aktuashon personalisá tambe ta posibel.

Muchanan ta sera konosí ku teater i ekspreshonnan teatral. Hóbennan ta siña konosé teater, aktuashon i krea nan propio obranan i hóbennan adulto ta siña konosé diferente género di teater, aktuashon, krea obranan propio i presentá.

Tur studiante ta presenta kada tres luna pa famia, amistatnan i tambe pa públiko en general. Nan ta pone den praktika tur loke nan ta haña den e lèsnan.

E promé paso por dal e na kas mes, i no afó so.

MISHON I VISHON

Nos kier inspirá mas tantu Yu di Kòrsou posibel ku lokual e mundu di aktuashon teatral profeshonal tin di ofresé i tambe laga sera konosí ku e diferente géneronan den e mundu teatral.

Fiel nos ta kere ku na Kòrsou tin hopi talento i nan meresé e aksesibilidat na kas aki mes pa kuminsa desaroyá nan talento. E promé paso por dal e na kas mes, i no afó so.

E vishon ku nos tin pa e Akademia ta eduká, duna mucha, hóben i adulto oportunidat pa traha aki na Kòrsou mes komo aktor. Sí dado kaso nan lo kier bai studia afó después, nan lo haña un bon fundeshi na Elisa Academy. Un ‘vooropleiding’ den futuro ta e soño di mas grandi ku nos tin pa e Akademia. Tambe kompanianan por elevá nan produkshonnan hasiendo uzo di nos talentonan lokal ku sa di e materia di aktuashon. Un Akademia di teatro i aktuashon ta bon pa henter e komunidat. Tantu pa desaroyo personal i artístiko di un persona komo estado emoshonal i ekonómiko di un pais.

Loke ta importante pa sa ta ku na Elisa Academy no solamente bo ta siña pa bira un aktor pero bo ta haña formashon tambe. Sera konosí kubo mes na un otro manera. Bo no mester kier bira aktor so, pero bo mester por kier haña e miho vershon di bo mes.

Nos tei pa engrandesé e bunita abilidat di ekspreshon i ta bo mes.

Teater nos ta hasié huntu!