Nos promé luna a pasa asin’ei. E progreso di e studiantenan di Elisa Academy a kuminsá bira visibel. Den korto tempu e muchanan a sa di sali for di nan zona konfortabel i tuma kurashi di ekspresá nan mes. 

Aktuashon ta rekerí trabou duru, hopi dedikashon i bastante invershon di  bo tempu. Pa para riba un podio dilanti un públiko bo mester tin kurashi i pashon pa ehersé e trabou di aktor i òf performer. Mayoria hende ta mira aktuashon komo un hòbi, kual naturalmente ta posibel, pero nos no mester lubidá ku e profeshon di aktor tambe ta un trabou ku hende ta siña p’é i ta wòrdu hopi bon pagá p’é. Pensa un ratu riba bo aktor òf ‘performer’ preferí. E ta un miyonario no? Òf en todo kaso e ta gana bon sèn. 

‘Nos no mester lubidá ku e profeshon di aktor tambe ta un trabou ku hende ta siña p’é’

Den e promé luna nos muchanan a siña e arte di emoshon: kon rekonosé esaki, kua emoshonnan tur tin i kon bo ta pone nan den práktika (aktua). Tambe nan a wòrdu introdusí ku e arte di fantasia. Den e promé lèsnan tabatin sierto di nan ku tabata tímido i otronan for di komienso tabatin yen di kurashi. Awor aki nos no por mira un distinshon. Kiermen ku nan a lòs mas i e grupo tambe a sera. 

Loke nos hóbennan a siña den e luna ku a pasa ta: e arte di monólogo, introdukshon ku improvisashon, sierto reglanan di aktuashon i tambe orientashon di espasio. Loke nos hóbennan ta haña ta un kombinashon di aktuashon i teatro. Ku teatro nos ke men e forma di arte kaminda aktornan ta presentá ‘live’ òf aktua den obranan teatral pa un públiko. 

Den e lastu lès di luna nan a presentá nan monólogo i nos tin ku bisa ku nos ta hopi orguyoso di e desaroyo di nos hóbennan. Tur e diferente ensayonan den lès ta yuda nan pa ora yega e momentu di presentá.

‘Ku teatro nos kiermen e forma di arte kaminda aktornan ta presenta ‘live’ òf aktua den obranan teatral pa un públiko’

Nos adultonan tambe ta den gran forma. Awor aki nan ta trahando duru pa dominá e téknika di uso di bos, praktiká e reglanan di improvisashon i tambe e base di studia un personahe. Loke nos ta kòrda tur studiante di Elisa Academy ta ku nan ta den un proseso. Nan no ta siña solamente aktua pero tambe nan ta siña konosé nan mes na un otro manera. Pa bo desaroyá i krese ta tuma tempu i sigur perserveransha (riba tur tereno ta asina). Siña algu nobo i transformá bo mes den bo mihó vershon ta rekerí kai i lanta bèk.

Awor e klasnan ta formá i e studiantenan di Elisa Academy ta entusiasmá pa siña kada dia mas. Nos a tuma nota ku mas hende ta interesá den e lèsnan di aktuashon i teatro. Ta pa e motibu aki nos a habri nos inskripshon pa studiantenan nobo.

Muchanan di 5 te ku 11 aña i tambe hóbennan di 12 pa 18 aña por inskribí awor i kuminsa lès dia 6 di Novèmber. Nos no por warda pa risibí nos studiantenan nobo.

Si bo tin pregunta tokante nos lèsnan i otro servisionan ku nos ta brinda, no duda pa tuma kontakto ku nos. 

Elisa Academy ta nos tur!